Հայաստանի Բանկերի Միություն

CRS Համակարգի Ներդրման Հիմունքները՝ ՀԲՄ կազմակերպած սեմինարում

ՀԲՄ նախագահ Դանիել Ազատյանն ընդունել է Grant Thornton Luxembourg-ի Հարկային և ֆինանսական ծառայությունների տնօրեն Ալան Վերբեկենին, ով ՀԲՄ նախաձեռնությամբ բանկային հատվածի և ֆինանսական այլ կառույցների աշխատակիցների համար կանցկացնի սեմինար՝ Ֆինանսական հաշիվների վերաբերյալ տեղեկությունների ավտոմատ փոխանակման համակարգի ներդրման վերաբերյալ։

Նշենք, որ ՀՀ կողմից ստանձնած պարտավորությունների համաձայն՝ 2025 թվականի հունվարի 1-ից նախատեսվում է ավտոմատ կերպով իրականացնել ոչ ռեզիդենտների՝ ՀՀ-ում գործող ֆինանսական հաստատություններում առկա ֆինանսական հաշիվների մասին տեղեկությունների փոխանակում, որն իրականացվելու է Տնտեսական համագործակցության և զարգացման կազմակերպության (ՏՀԶԿ) «Հարկման նպատակով թափանցիկության և տեղեկությունների փոխանակման գլոբալ ֆորումի» Միասնական հաշվետվողական Ստանդարտին համապատասխան:

Կարևորելով թեմայի վերաբերյալ բանկային հատվածի և ֆինանսական այլ կառույցների կողմից մեծ հետաքրքրվածությունը՝ սեմինարը կանցկացվի 2 օր՝ մարտի 5-ին և 6-ին, անվճար հիմունքներով։

Սեմինարին ներկայացվող թեմաներն են՝

• Ֆինանսական հաշիվների վերաբերյալ տեղեկությունների ավտոմատ փոխանակման համակարգը,
• CRS-ի հիմնական սկզբունքները,
• Նմանություններ և տարբերություններ FATCA-ի հետ,
• Հաշվետերերի դասակարգում CRS-ի ներքո․ պատշաճ ուսումնասիրություն,
• CRS-ով նախատեսված հաշվետվողականություն,
• Տվյալների պաշտպանություն,
• Ներդրման գործընթաց։