Հայաստանի Բանկերի Միություն

Միությունը իրավաբանական անձ ոչ առևտրային կազմակերպություն է, որի ստեղծման նպատակն է եղել բանկերի շահերի պաշտպանությունը:

Հայտնի են «Տարվա լավագույն ֆինանսաբանկային հրապարակում» մրցույթի 2022թ․ հաղթողները

12.05.2023
Հայտնի են «Տարվա լավագույն ֆինանսաբանկային հրապարակում» մրցույթի 2022թ․ հաղթողները

  Նպատակ ունենալով խրախուսել ոլորտի մասնագետներին, փորձագետներին, գիտական աշխատողներին և ոլորտը լուսաբանող լրագրողներին իրենց աշխատանքներում անդրադառնալ ֆինանսաբանկային ոլորտի արդիական թեմաներին, ինչպես նաև կարևորելով հանրության լայն շերտերին անկողմնակալ և փաստերի հիման վրա կառուցված տեղեկատվության տրամադրումը՝ Հայաստանի բանկերի միությունն (ՀԲՄ) արդեն 4-րդ անգամ անցկացրեց «Տարվա լավագույն ֆինանսաբանկային հրապարակում» թեմայով մրցույթը։

  «Լավագույն գիտական հոդված», «Լավագույն վերլուծություն» և «Լավագույն լրագրողական անդրադարձ» անվանակարգերում առևտրային բանկերի ներկայացուցիչներից ձևավորված ժյուրին գնահատել է 2022թ․ ընթացքում հրապարակված գիտական և վերլուծական հոդվածները, ինչպես նաև լրագրողական հրապարակումները։ ՀԲՄ-ում կայացած մրցույթի արդյունքների ամփոփման միջոցառման շրջանակում մրցութային անվանակարգերի հաղթողներին ՀԲՄ-ի կողմից հանձնվեցին հավաստագրեր և դրամական մրցանակներ:

  Շնորհավորելով մրցույթի հաղթողներին՝ ՀԲՄ խորհրդի նախագահ Մհեր Անանյանը շնորհակալություն է հայտնել լրագրողական համայնքի և ակադեմիական շրջանակների ներկայացուցիչներին երկարամյա և արդյունավետ համագործակցության համար:

  «Մեզ համար անչափ կարևոր է հասարակության առողջ և ֆինանսապես գրագետ անդամներ ձևավորելը և այս հարցում ձեզնից յուրաքանչյուրը կարող է ունենալ իր ներդրումը: Վստահ եմ, որ հետագայում ևս կպահպանվի վերջին տարիների միտումը, երբ տարեցտարի ավելանում է մրցույթի թե մասնակիցների, և  թե մրցութային հայտերի թիվը՝ միաժամանակ ապահովելով որակյալ և արժանահավատ տեղեկատվություն: Շնորհավորում եմ բոլորիդ և մաղթում նոր հաղթանակներ»,-նշել է ՀԲՄ խորհրդի նախագահ Մհեր Անանյանը:

  Մրցույթի «Լավագույն գիտական հոդված» անվանակարգում հաղթող է ճանաչվել ՀՊՏՀ կառավարչական հաշվառման և աուդիտի ամբիոնի ասպիրանտ Արման Համբարձումյանի և ԵՊՀ մաթեմատիկայի և մեխանիկայի ֆակուլտետի ակտուարական և ֆինանսական մաթեմատիկայի բաժնի ուսանող Մեսրոպ Մեսրոպյանի համահեղինակած «Վերահսկողական սթրես թեստավորումը որպես ՀՀ առևտրային բանկերի ֆինանսական ռիսկերը կառավարելու նոր գործիք» գիտական հոդվածը։ «Լավագույն վերլուծություն» անվանակարգում հաղթող է ճանաչվել ՀՊՏՀ ֆինանսներ ամբիոնի դոցենտ, տնտեսագիտության թեկնածու Էդգար Աղաբեկյանի «Կենսաթոշակային ֆոնդերի եկամտաբերության անկման հիմնական պատճառները կամ ո՞վ է մեղավոր» վերլուծությունը։ «Լավագույն լրագրողական անդրադարձ» անվանակարգում հաղթող է ճանաչվել բանկային գաղտնիքի վերաբերյալ տնտեսական լրագրող, «Արմինֆո» լրատվական գործակալության և Տնտեսական լրագրողների ակումբի լրագրող-թղթակից Նաիրա Բադալյանի հրապարակումը։

  ՀԲՄ գործադիր տնօրեն Սեյրան Սարգսյանի խոսքով՝ այսօր լրատվական դաշտում շրջանառվող տեղեկատվությունը, մասնավորապես՝ ֆինանսաբանկային թեմաներով հրապարակումները, ոչ միշտ են անկողմնակալ, հավաստի և բազմակողմանի ներկայացված, փոխարենը հանդիպում ենք հանրությանը ապակողմնորոշող տեղեկատվության։ Այս տեսանկյունից ոլորտի ներկայացուցիչների կողմից մշտապես կարևորվել է հանրությանը՝ որակյալ և մասնագիտորեն հիմնավորված բովանդակությամբ հրապարակումների մատուցումը, ինչը թույլ է տալիս իրազեկ լինել ֆինանսական ոլորտի վերաբերյալ զարգացումներից, ինչպես նաև օգնում է սեփական ֆինանսները կառավարելու և գրագետ որոշումներ կայացնելու հարցում։

  «Թեև բանկային համակարգը և վերջինիս գործունեության վերաբերյալ տեղեկատվությունը բաց է և հրապարակային, սակայն մշտապես կա կարիք այդ ամենը հանրությանը ներկայացնել առավել հասանելի և ընկալելի եղանակով։ Այս տեսանկյունից անչափ կարևոր է ակադեմիական շրջանակների և ոլորտը լուսաբանող լրագրողների ներուժի ներգրավումն ու օգտագործումը։ Այս նպատակին է ուղղված նաև միության կողմից անցկացվող ամենամյա մրցույթը։ Շնորհավորում եմ մրցույթի բոլոր հաղթողներին և ևս մեկ անգամ վերահաստատում ՀԲՄ պատրաստակամությունը՝ ակտիվ համագործակցել լրագրողական համայնքի և ակադեմիական շրջանակների հետ՝ ոլորտի վերաբերյալ անկողմնակալ, հավաստի և որակյալ հրապարակումների պատրաստման և հանրայնացման հարցում»,-ընդգծել է ՀԲՄ գործադիր տնօրեն Սեյրան Սարգսյանը։

  Նշենք նաև, որ առևտրային բանկերը ևս սահմանել էին հատուկ և խրախուսական մրցանակներ։ 

Նմանատիպ նորություններ

Համատեղ ուսումնամասնագիտական ծրագրեր, սեմինարներ և կոնֆերանսներ․ հուշագրի ստորագրում «Հայաստանի Օքսֆորդի շրջանավարտների բիզնես ակումբ»-ի հետ
Համատեղ ուսումնամասնագիտական ծրագրեր, սեմինարներ և կոնֆերանսներ․ հուշագրի ստորագրում «Հայաստանի Օքսֆորդի շրջանավարտների բիզնես ակումբ»-ի հետ
19.06.2024

«Հայաստանի բանկերի միություն»-ը և «Հայաստանի Օքսֆորդի շրջանավարտների բիզնես ակումբ»-ը ստորագրել են համագործակցության հուշագիր, որով ամրապնդել են ֆինանսաբանկային ոլորտում առաջընթացի նոր ծրագրեր իրականացնելու հեռանկարը։

«Հայաստանի բանկերի միություն»-ը և «Միջազգային ֆինանսական կորպորացիա»-ն միավորեցին բանկային և կառուցապատման ոլորտի մասնագետներին կանաչ կառույցներ ստեղծելու գաղափարի շուրջ
«Հայաստանի բանկերի միություն»-ը և «Միջազգային ֆինանսական կորպորացիա»-ն միավորեցին բանկային և կառուցապատման ոլորտի մասնագետներին կանաչ կառույցներ ստեղծելու գաղափարի շուրջ
13.06.2024

  Բանկային և կառուցապատման ոլորտի ներկայացուցիչների մասնակցությամբ այսօր տեղի ունեցավ «Հայաստանի բանկերի միության» և «Միջազգային ֆինանսական կորպորացիայի» համագործակցությամբ կազմակերպված «Կայուն հորիզոններ. ուրվագծելով Հայաստանում կանաչ կառուցապատման ներդրումների ապագան» միջոցառումը։


«Հայաստանի բանկերի միությունը» և «Հայաստանի կառուցապատողների ասոցիացիան» համագործակցության հուշագիր են ստորագրել
«Հայաստանի բանկերի միությունը» և «Հայաստանի կառուցապատողների ասոցիացիան» համագործակցության հուշագիր են ստորագրել
11.06.2024

«Հայաստանի բանկերի միությունը» և «Կառուցապատողների հայկական ասոցիացիան» այսօր՝ հունիսի 11-ին, ստորագրեցին հուշագիր, որը երկուստեք կնպաստի ոլորտային խնդիրների բարձրացմանը և լուծման ուղիներ գտնելուն, կողմերի շահերի ներկայացմանն ու պաշտպանությանը։